قابلِ صد احترام اساتذہ پنجاب السلام و علیکم ! صد شکراللہ بزرگ و برتر کا کہ جس کے کرم سے آپ لوگوں کا دیرینہ مطالبہ (اپ گریڈیشن) پایہ تکمیل کو پہنچا۔ آپ میں سے بہت سے دوست شاید اس بات سے نا آشنا ہوں کہ آپکے اس مطالبے کو پایہ تکمیل تک پہنچانے میں پنجاب ٹیچرز یونین کے عہدیداران نے بے پناہ مصائب و تکالیف خندہ پیشانی سے نہ صرف برداشت کیں بلکہ جب جب بھی اُن پر مصائب کے پہاڑ توڑے گئے وہ پہلے سے بھی زیادہ عزم کے ساتھ میدان عمل میں سرگرم نظر آئے۔ موجودہ چئیرمین پنجاب ٹیچرز یونین سید سجاد اکبر کاظمی جو اُس وقت مرکزی صدر تھے کوملازمت سے فارغ کر دیا گیا مگر آفرین ہے اُن پر کہ انہوں نے اپنے دُکھ کو بھول کر اساتذہ کے لئے تگ و دو جاری رکھی۔مرکزی جنرل سیکرٹری پنجاب ٹیچرز یونین رانا لیاقت علی کی سروس کو بلاجواز اس الزام میں سرنڈر کیا گیا کہ وہ ٹیچرز کاز کے لئے سرگرم تھے مگراُن پر بھی آفرین کہ اُن کے ولولہ میں ہزار مصائب کے باوجود کوئی لغزش نہ آئی جبکہ کچھ مایوس عناصر اور مخالفین کی طرف سے اِن بے جا سزاؤں پر نہ صرف خوشیاں منائی گئیں بلکہ بارہا کہا گیا کہ اپ گریڈیشن ہو ہی نہیں سکتی اور پنجاب ٹیچرز یونین اساتذہ کو اپ گریڈیشن کے نام پر گمراہ کررہی ہے ۔سید سجاد اکبر کاظمی ، رانا لیاقت علی کی طرح دیگر عہدیداران کا معاشی و معاشرتی استحصال کیا جاتارہا اور مخالفین میں خوشیاں منائی جاتی رہیں لیکن پھر صد شکر اُس غفور رحیم کا کہ جس نے نیک نیت سے کی جانے والی کوشش کو کامیابی سے ہمکنار کرنے کا وعدہ فرمایا ہے اساتذہ کے اس دیرینہ مطالبہ کو پایہ تکمیل تک پہنچایا۔ میں پنجاب ٹیچرز یونین کے مرکزی صدر چوہدری محمد سرفراز، چئیرمین سید سجاد اکبر کاظمی، مرکزی جنرل سیکرٹری رانا لیاقت علی اور دیگر مرکزی عہدیداران کی طرف سے دل کی گہرائیوں سے تمام اساتذہ برادری(بشمول مخالفین) کو مبارکباد پیش کرتا ہوں
دعا گو
طارق زیدی
میڈیا کوارڈینیٹر